牽手講，伊紲落來會愈來愈無閒，拜六禮拜攏愛加班，若欲出去𨑨迌，就愛趁這禮拜。拜五暗時，一个揣旅社，一个訂車票，一睏仔就安排好勢。
拜六透早起來，看著牽手咧熨衫（ut-sann）閣摒掃，想講伊攏款好啊。結果根本攏無款！藍牙耳機袂記就準煞，竟然含逐工愛換的隱形目鏡嘛放袂記！佳哉我昨暗包袱仔有先款，至少欲換的內衫佮洗溫泉用个面巾攏有紮。
東京去草津溫泉無方便。本來想欲坐高鐵，查查咧，發現坐高鐵嘛是愛換車換幾若擺。想來想去，決定坐直達的客運。客運的位誠狹，坐起來無爽快，佳哉中有佇休息站歇一下，會當落去行行咧，買一个點心。
到位的時陣，才點外，check-in的時間猶未到，就先行去看草津溫泉的「湯田」。「湯田」（湯畑／ゆばたけ）是啥物咧？「湯」就是溫泉流出來的燒水。「田」本來是講生產農作物的所在，遮的「田」是咧講調節溫泉水的設備。為啥物溫泉的水愛調節？毋是講天然的上好嘛？因為草津的溫泉水傷燒，愛降溫過，遮有法度泡。湯田主要的作用，就是予燒滾滾的溫泉水溫度降落來。
湯田邊仔有一个所在叫做「熱乃湯」(ねつのゆ)，會當看湯揉的表演。湯揉（ゆもみ）就是甲溫泉的燒水攪攪撋撋咧，目的嘛是欲降溫。
（相片來源：https://onsenbu.net/28512 ）
表演看完腹肚枵啊，本來欲佇湯田邊仔食中晝，Google地圖查落，發現遮的店名聲攏無概好，竟然含三粒星攏無。附近揣著一間叫「夢花」的餐廳，tenpura袂歹食。
閣來行去「草津熱帯圏」看動物。摸著水豚、豚鼠、倉鼠、猴、兔仔佮雞仔囝、。水豚佇電視看起來足古錐，但是本人誠大隻，摸起來𠕇硞硞（tīng-khok-khok）。豚鼠較細隻，毛較幼，比水豚古錐。兔仔的毛摸起來，敢若高級大衣！
轉來旅社，check-in完，佇附近的店食糋豬排飯做暗頓。照旅社小姐建議的路線，行去泡西河原露天溫泉（さいのかわらろてんぶろ）。西河原公園的電火照甲誠媠，步道行起來誠有氣氛。溫泉池誠闊，泡起來誠四序，風景嘛誠好。想欲𤆬媽媽in來，但是想著就算in來日本揣我，對東京來遮坐車就愛坐四點外鐘，會傷忝！
暗時的「西河原公園」佮「湯田」攏有電火，佮日時的氣氛無仝，照了誠媠！這遍來草津干焦過一暝，本來想講閣泡一間，才會夠本。但是牽手忝啊，決定轉來睏。
旅社看起來誠新、誠清氣，但是柴做的枋仔厝隔音就是無好。雖然房間佇二樓，但是小可會聽著一樓的聲。牽手一睏仔就落眠，我是三不五時會聽著敢若是一樓便所的關門聲。
暗時睏無眠，透早爬袂起來。挲咧挲咧，差不多九點才出門。先行來湯田附近的「御座之湯」(ござのゆ)。草津溫泉較出名的景點攏佇仝一區，用行的就到，真方便。
（相片來源：https://www.dan-b.com/yu_gozanoyu/ ）
御座之湯規棟攏是用柴做的，看起來誠古早味。早時無啥物人咧泡湯，一開始加我佮牽手，嘛才三个人。阮兩人用siàm-phuh佮雪文膏甲身軀洗予清氣，才落去泡。水誠燒！紲落來陸陸續續有幾个人入來。看著有兩个少年家，身軀沖（tshiâng）沖咧就入來泡。我驚一趒，想講哪會遮癩哥。閣來，有一个中年人入來，嘛是用沖洗池（かけ湯／かけゆ）的水沖過就落來。奇怪，佇日本泡溫泉，毋是愛先洗予清氣遮落去泡嘛？敢講沖沖咧嘛會當？佇網路查，發現這兩派的日本人攏有。有人講，泡溫泉一定愛先洗予清氣；嘛有人講，有的所在用沖洗池的水沖過就會使，逐liah規定無仝，看泡的彼間告示按怎寫。
中晝食釜飯（かまめし）。釜就是鼎，日本的釜飯就是用一个細仔鼎予你食。好食，但是因為先食著甜的phū-lìn，飯較食袂落。毋知為啥物，日本的溫泉景點定定有溫泉phū-lìn。
一點半就愛上客運，食完中晝已經無啥物時間。佇一間叫「Yuki Usagi」的咖啡店啉茶歇一下，氣氛袂䆀，茶鈷閣刁工用布套崁咧。可能是奶茶啉傷濟，腹肚怪怪，煞來去走便所。上車進前，佇客運站邊仔的足湯（あしゆ）泡跤，水誠燒！但是泡完跤感覺誠輕鬆。
轉來時，小可窒車，但是嘛六點進前就到東京。轉來的時陣，會當佇厝附近欲落車，但是司機甲車停起來，嘛無講會當落車啊。我想講猶袂當落車，結果予司機念講，是有欲落車無！
沒有留言:
張貼留言