科學家有觀察著，北半球ê風颱咧踅（se̍h），是倒爿踅，那踅那將附近ê雲捲入來，形成一種捲螺仔形ê風暴。所以講，你若有機會對四萬尺懸ê所在看落來，你著知影，為啥物風颱外圍ê天，會予掃佮遮爾仔清清氣氣，晴和無雲。
馬蒂佇失去知覺進前，最後一眼著是看着這款深藍透底、若像寶石仝款ê藍天。
這个少年警察用手後蹺（tshiú-āu-khiau）將人群撥開，汗珠對伊ê喙䫌邊仔直直滴落來。伊向頭看家己黏甲規个青草色ê皮鞋，想欲提塗跤ê斷枝拭予清氣。但是邊仔遮爾濟人咧看，伊感覺有必要維持面色ê威嚴，就將雙手展開，出力將圍觀ê群眾撥去後壁。
佇這群人ê記憶內底，傱來毋捌搪著遮爾大ê風颱。一暝ê大風大雨，吹倒全城ê樹欉。留落來ê是這个城市難得一見ê藍天。
少年警察做管區已經有兩年外，伊頭一遍對家己ê工課佮人生感覺毋知影不如何是好。定定有人怨講，台北ê沙粉傷濟，青色傷少。若按呢講，這遍風颱就是來實現人ê願望。遮過一暝，台北就變成青草色ê城市。拄發芽ê幼枝、無依無倚ê幼葉仔，鋪滿馬路，鋪滿車輛，鋪滿厝簷，予透風掃入去烏暗ê亭仔跤、地下道，掃入去揤揤斜斜ê違章建築內底。軟溢溢ê葉仔就地歇喘，槭仔（tshiok-á）葉、榕仔（tshîng-á）葉、樟仔（tsiunn-á）葉、欖仁葉、木棉葉、大王椰子葉、七里香葉、相思仔葉、菩提樹葉……人想會到ê青色，全數從天而降，親像一齣歡喜閣戇想ê電影，颺颺飛起，翩翩落佇每一个向天ê平面。
無人看著這齣電影。早時，風雨消停，逐家遮開窗，看著青草色ê台北。逐家目睭挼挼咧，敢若猶佇咧眠夢。
--------------------------------------------------------
本譯文干焦是翻譯練習，不做任何商業用途。
原文：朱少麟所寫《傷心咖啡店之歌》ê起頭。
沒有留言:
張貼留言