昨昏去一間台灣料理，我佇櫃台用台語點菜。
我知影賣台灣料理的人無一定講台語。若是用台語點菜，我一定那講那比（菜單），一項一項講。等店員一項記起來（筆抑是手停落來），我才閣講後一項。若是店員真正毋知影按怎服務，我就會放棄，但是大部份攏無問題。
顧櫃台的是一个少年家，聽伊講話，可能是台灣人頭家的後生，無就是請來的台灣人（嘛有可能請來的中國人店員，但是聽腔口無成）。
我點一項，少年家就用華語閣講一遍我點的菜名。「排骨飯」、「豆花」，溝通無問題，嘛無拖著伊的時間。
唯一出現的問題，是我咧點的時陣，後壁徛一位看起來敢若是頭家的台灣人，用台語對我講：「你愛對伊講國語，台語伊聽無啦！」
攏已經點完欲付錢矣，彼个台灣頭家閣喝一遍：「你愛對伊講國語，台語伊聽無啦！」
我笑面笑面對頭家講：「伊聽有啦，我按呢比，伊聽有。」繼續用台語付錢，少年家嘛照常應對，並無因為聽著台語就毋知愛按怎服務。
出外討趁，無法度轉去，想欲講幾句仔台語，定定拄著這種聽著就緊出來叫你莫講台語的台語人。哎！
