翻譯學有一个詞叫做「假朋友」（false friend），意思是講兩个無仝語言的詞看起來sio-siâng，其實意思差足濟。
譬如講，袂曉日語的台語人看著「金玉」（きんたま），可能會想著「黃金佮玉石一類的金銀財寶」。
毋過，日本人看著這个漢字詞，會想著「𡳞脬」（lān-pha）抑是「𡳞核」（lān-hu̍t）哩。
按呢逐家就知影，為啥物日本人來台灣看著「金玉堂」會驚一趒。
最近咧翻『人間失格』，翻著一句：「自分は東北の田舎に生れましたので、汽車をはじめて見たのは、よほど大きくなってからでした。自分は停車場のブリッジを、上って、降りて…」。
檢查家己的翻譯的時，我想講這个停車場的「ブリッジ」到底是啥物橋；幾若十冬前日本的停車場，應該佮這馬無仝hōng？
查落去，發現不得了，日語的「停車場」是唸做「ていしゃば」，而且根本毋是停汽車的所在，是火車啊啊啊啊啊。
我才想著，現代日語的停車場是「駐車場」（ちゅうしゃじょう），而且「汽車」（きしゃ）是「火車」（hué-tshia）的意思。明明（N冬前）有學過，竟然袂記矣。
交朋友，愛注意啊！
