浪鳥集（Stray Birds）001

台文翻譯（台語發音）：

夏天的浪鳥（lōng-niáu）飛來阮的窗，唱歌，又閣飛去。

秋天的黃葉，無歌，翩翩落下，留落來一聲嘆。

英語原詩：
Stray birds of summer come to my window to sing and fly away.

And yellow leaves of autumn, which have no songs, flutter and fall there with a sigh.

（作者：Rabindranath Tagore）

我發現華語版一般翻做先發出嘆息的聲，才閣落下。

例：「只一聲嘆息，便飄落而下」（譯者：卓加真）

但是英語原文（flutter and fall there with a sigh）並沒遐爾清楚。

我認為，這聲嘆息（a sigh）有可能是葉仔離枝的聲、落下時的聲，嘛有可能是落佇塗跤的聲。嘛有可能是將頭到尾的聲攏當做一聲。

我後來想想咧，作者原詩用「sigh」做尾，可能想欲創作「聲過猶原在耳」的效果，毋管這聲嘆是咧講佗一聲，攏會使聲過猶原在耳，

浪鳥集（Stray Birds）002

台文翻譯（台語發音）：

這群小小世間浪者啊，留恁的跤跡佇我的文字。

英語原詩：
O TROUPE of little vagrants of the world, leave your footprints in my words.
（作者：Rabindranath Tagore）

這首詩的「vagrant」佇華語定定翻做「流浪者」、「 漂泊者」。其實「vagrant」無一定是咧講人，離開家己族群的動物，嘛會使講是「vagrant」。

而且「vagrant」頭前用「little」， 若是咧講人，「little vagrant」聽起來親像親像是「流浪在外的囡仔人」。後遍閣接一个「of the world」，敢講這是咧形容講有一陣囡仔人流浪全世界？

而且「vagrant」用「troupe」做單位。「troupe」一般是用來形容一陣四界走傱，唱歌跳舞的表演者。用來形容無厝通轉的流浪囝，我個人感覺無合理。

若是將「vagrant」解說做「離開族群的鳥仔」，是毋是較有道理？

將第二首詩的「vagrants」解說做第一首詩的「stray birds」，就會當前後呼應。「little」是形容鳥仔細隻，「of the world」是因為「鳥仔佇世界足濟所在飛來飛去」，「troupe」是形容「鳥仔做一群來，佇窗仔門邊叫來叫去、跳來跳去，袂輸是一團來表演的」。

當然啦，到底「vagrant」是咧講人抑是鳥，我嘛無把握。作者已經做仙啊，欲問嘛問無。既然第一首詩的「stray birds」我創作新詞翻做「浪鳥」，這首詩的「vagrants」翻做「浪者」敢若嘛會使。「者」會當是講人，嘛會當是咧 講鳥仔。 

「words」 一般華語翻做「文字」。我本來感覺講「文字」是用寫的，但是「words」無一定是寫的文，嘛有可能是講的話。本來想欲翻做「話」猶是「話語」。但是想想咧，鳥仔踏過的跤印，是毋是看起來足相象形文字？作者將這當做伊作詩的靈感，翻做「文字」，彼个意象嘛是誠合，我就決定學前人的步，翻做「文字」。

後半句的「leave your footprints in my words」，我本來想欲翻做「將恁的跤跡留佇我的文字內底」。

但是我感覺唸起來就是無夠媠氣。當然啦，嘛是有人的感覺講原詩本來就足淺白，無成傳統的英文歌詩，有押韻，句讀媠。

我想想咧，台語本來就有「留我佇遮」的句型，這个「留……佇……」的句型，拄仔好會當對應著英文原詩的「leave...in...」，所以就決定翻做「留恁的跤跡佇我的文字」。