華語有法度翻的外語詞，台語哪有可能無法度處理？

台語發音

用翻譯來幫助一个語言吸收新的概念，這對華語來講是誠正常的代誌，但是台語敢若毋是按呢。

大部份台語母語的人根本無咧講台語，但是講著外來的名詞欲按怎翻做台語，就全意見。

有意見提出來講當然是好，但是一个詞毋管翻了偌好，無人講就會死。先開喙，才有通講！

顛倒講來，華語烏白翻的詞一大堆，但是因為誠濟人講，就一直保存落來。

問題毋是干焦按呢爾爾。就算是推捒講台語的台語文人士，嘛是對台語無信心，認為無法度用台語來解說新的概念。逐遍拄著新詞，就一堆人堅持「用原文」。到底咱是咧推捒講台語抑是講外語？

無就是講：「這阮（無讀過冊）會曉講台語的阿媽聽無！」。敢講你會因為恁兜講華語的人聽無「演算法」這个詞，就堅持華語拄著這个詞，一定愛講「algorithm」，無就規氣莫講？

華語有法度翻的外語詞，台語哪有可能無法度處理？

最近看電腦（Tsuè-kīn Khuànn Tiān-náu）

台語發音

最近看電腦感覺足食力，螢幕看無五分鐘，目睭就痠。 

恁爸今年十八，無可能是老花。想著頂遍健康檢查，講我兩邊的視力有差，愛注意。 

我隨去配目鏡。店員姑情我講，定定繩（tsîn）電腦、掰（pué）手機仔，愛買藍光鏡片。我幼齒的好騙，當然嘛予伊當做盼仔，乖乖仔付錢。普通的鏡片毋免等，藍光的鏡片愛等一禮拜。 

新目鏡猶未攢好，嘛是愛上班用電腦，實在是目睭痠甲受不了，走去看眼科。

醫生講，我是用眼過度，目睭的筋肉傷緊張，無法度好好仔調節欲看的距離。 結果，愛點一個月的目睭藥仔，等目睭周圍的筋肉恢復正常，度數才會準。這馬配目鏡，度數傷重矣。後來提著新目鏡，掛咧果然頭會疼！ 

這个故事教咱一个道理：目睭無爽快，先去看眼科。（加・講・的）