（相片來源：https://movies.yahoo.com.tw/）
這齣電影是講一个印度的阿母，逐工為家庭付出，煞因為英語講了較頇顢（hân-bān），定定予家己的尪，甚至家己的囡仔看袂起。
=====閣來會講著故事內容，猶未看的人家己斟酌看呢=====
伊蹛佇美國紐約（niú-iok）的姊姊敲電話予伊，講查某囡仔欲結婚，請伊來美國鬥相共，伊就來美國鬥跤手，準備婚禮。有一工，伊佇路邊看著英語課的廣告，伊就決心去報名學英語。
印度的語言誠濟，有人講有幾若百種，嘛有人講是幾若千種。官方語言是印地語（ìn-tē-gí）佮英語，但是學校誠濟是講英語，一般的人嘛感覺講英語較有智識。印度的英語，佮台灣的華語，地位敢若淡薄仔相siâng。
我感覺這齣電影主題誠趣味，但是小可較長，超過兩點鐘。起頭是描寫（biâu-siá）印度的生活，後壁是講主角佇美國上英語課的故事，國際學生做伙上課，發生足濟笑詼（tshiò-khue）。
雖然主題是學英語，其實有描寫出印度男女無平等（pîng-tíng）的現象。譬如主角家己有做點心咧賣，逐工去配送（phuè-sàng）予人客，但是in尪感覺這無啥物，含啉茶攏愛喝（huah）主角來攢（tshuân）。閣譬如講，主角看著家己囡仔小可著傷，就怪家己哪會無一直陪佇囡仔身軀邊，走去上英語課。
這齣，袂歹看嗷！
沒有留言:
張貼留言